كل واحد و قسمو

لحكاية هذه صارتلي قبل ما نخرج في الاجازة ببعض الأيام و بما أني حاليا فاضي شغل ، ما فيها باس نحكيها في الفضاء الممتاز هذا

اذن نروح مالخدمة امخر علي غير عادتي، ناقف في علامة قف و باش ندور علي اليمين
برشة سيارات تعداو و أنا ما زلت واقف تقديرا للعلامة أكثر منها حاجة أخري

صف السيارات طوال برشة علي يميني ، قررت، إذن ، باش نبدل الوجهة متاعي و نحرق الستوب و ندور علي اليسار ، و زادة خاطر علي اليمين ثمة مفترق طرق و كان حرقت ثمة فرصة كبيرة نجي في حجر عون الحرس، والي خاف نجي

الثنية الي مشيت منها هي أطول ببرشة من ثنيتي العادية، لكن تمتاز علي الأخرى إلي هي فارغة و ما فيهاش حركة كبيرة متاع سيارات

حاسيلو ممشيتش كلم وأنا نشم في ريحة حراق، كذبت و قلت ممكن نستخايل
لكن الريحة موجودة و تمشي و تزيد

و صلت لبلاصة في الخلاء، و قفت الكرهبة ، وقلت نشوف شنية لحكاية، شكون قال ناقصة مأء

نحل الكبوت متاع الكرهبة ،نتفقد الماء، لا بأس عليه
نسكر الكبوت ، نخدم السيارة ما حبتش تمشي ، نحاول برشة مرات، شيء لا حياة لمن تنادي


من نطولش لحديث ، كيما عادتي في الحالات هذومة طلبت ولد خالتي المكانيكي ، حكيتلو لحكاية ، قالي أعمل هكة، قد هكة، مفهمت منو شيء، قتلو باهي تو نتصرف وحدي
......