حزام الامان

ليوم في القايلة ، وقفني عون الحرس و انا مروح مالبحر وقالي باش نعملك مخالفة علي عدم وضع حزام الامان ، أنا شخصيا ما كانش عندي خلوق باش نحكي معاه و مخالفة ما تستحقش نطيح من قدري علي خاطرها و حتي الاسبوع الفارط وقفوني علي عدم احترام الاولوية ، والي هي تستحق محضر ، قتلو أعمل الي تراه صالح ، لكن يعطيه الصحة طلع ناس ملاح معمل شيء و في طريق العودة لقيتو مازال يخدم ، بايبيتلو و حياني ... مخ الهدرة وليت نحس ببرشة رخص كي نلحلح بعون مرور والتلحليح بصفة عامة انا من أصلي منحبوش

هو لا محالة كي تجيء تشوف الرخص في المصالح جائز..و حكاية ليها أعوام ، علي أول مخذيت رخصة السياقة أو بالاحرى علي أول مخذيت السيارة ، و قفوني علي مخالفة اجتياز ضوء أحمر ، و بما أني مازلت جديد في الطرقات و ما زالت عندي كرامة و متربيتش عالتلحليح ، محكيتش معاهم بلكل ..لكن رصاتلي في خطية و شهر منسوقش.. كانتلي درس و من و قتها تعلمت الرخص و كل ميوقفني بوليس نحكي معاه و نسلكها في أغلب الاحيان...و يا ندفع حويجة علي عين المكان ، والا نسلكها بالمعارف و ندفع حويجة زادة

حسيلو من نطولوش لحديث، ما عادش عندي كيف باش نطيح من قدري من أجل مخالفة والا حتي محضر و ممكن نقولو رجع الدر الي معدنه..ما كلمتوش بلكل و كانتلي مخالفة بعشرين دينار في جرة حزام الامان

أول ردة فعل ، قلت مابيني و بين روحي ، الأسبوع الفارط مشيت للبحر خليت هاتف جوال من الجيل الثالث و خمسين دينار، كي جاتني المرة هاذي في عشرين دينار نتسمي سلكتها .. قمت نضحك وحدي و قلت ظاهرلي دخلت في ثنية موش باهية و ربي يقدر الخير

و من بعد قررت منيش باش نحط حزام الامان ، أكثر منها شماتة في عون الحرس .. انا سياسة الردع منحبهاش و موش خاطر عملي مخالفة باش ترصيلي نسمع لكلام .. و هذا حزام الامان منيش مقتنع بيه بلكل و أحسن وسيلة للوقاية من حوادث الطرقات هي الانتباه و الوقاية خير من العلاج و من طبيعتي منحبش الحصرة و هذي أموري الشخصية نحط حزام والا منحطش ، حياتي و أنا حر فيها و من نضرش غيري كي منحطوش

و من بعد ضربت خماسي في سداسي و قلت يا فرفر يزي من صحة الراس ، كي يلقاوك من غير حزام يعملولك مخالفة و ما يخسرو عليك شىء و متكون كان انتي المتضرر ... لقيت حل وسط حتي لا يجوع الذئب و لا يشتكي الراعي ، و هو نحط الحزام عالعنين من غير ما نسكرو ...