ولد الجمعية

لبارح مالخدمة مشيت لطبيب ولد جمعية ، اختصاص طب عام ، باش يبعثني لطبيب صاحبو ، ولد جمعية زادة، مختص في الشيء الي أنا نشكي منو

نوصل للطبيب العام، نسأل السكرتيرة: الطبيب وحدو ؟

اُدخُلّو بحذاه فلان-

و فلان بين قوسين هو دكتور يخدم مندوب طبي و ولد جمعية زادة

نحل الباب

السلام عليكم-

زارتنا البركة-

كلمت صاحبك؟ باش نمشيلو توة-

يكلم وقتها الطبيب المختص و يعطيني' كا رت فزيت' باش نهزها معاي و يكتبو لثنين في قفاها كلمتين الي أنا من طرفهم باش يفرح بي و يختموها بعاش النادي الافريقي

.....

نوصل لعيادة ا لطبيب المختص ، نلقي قاعة الانتظار معبية، و مشاكل مبين السكرتيرة و بعض المرضي ، كل واحد يحب يدخل قبل، و السكرتيرة تريض فيهم والي هي تتفهم التذمر متاعهم و قلتلهم : بربي ياخي ثمة شكون يحب يستني؟.. لكن كل واحد و دَوْرُو

أنا بصراحة حبيت نجاوبها، الي أنا ميقلقنيش نقعد نستني وعادي نصبر ، لكن قلت خطاني، معنديش كيف باش نتكلم و نشاركهم في حديث لا يزيد ، لا ينقص

....

بعد ساعة انتظار و الا أكثر يجيء دَوْري ،آخر واحد

ندخل للدكتور( عمرو يمشي في الخمسين و يظهر ناس ملاح) نعطيه' الكارت فزيت'، يقرا الكلام الموجود ، نستني فيه باش يسئلني عن سبب الزيارة ، ياخي سئلني : عاجبتك الجمعية؟

شيء ما يعجب-

و يشدني بالكلام ، تحليل مقابلات ، تحليل تمارين، نقد لاعبين ، تحليل طبي ، علمي ..ما خلي شيء و انا نسمع

معرفتش شنعمل ، توة هو كلامو كي تجيء تشوف ممتع و فيه برشة اضافة و انا من ناحية المبدأ كي تحكيلي علي الجمعية، حاجة مهمة عندي، لكني مجيتش علي هذا

.....

نْقُص عليه؟... عيب ميجيش و شكون قال يتغشش و يعطيني دواء موش باهي و توة بركة كنت نشكر في روحي الي عندي برشة صبر

....

هو يحكي ، قال: ثمة حاجتين مهمين، اولا

انا قلت يكمل ثانيا و نقص عليه مباشرة

بعد ثانيا دخل يحكي مباشرة في حاجة أخري

....

بعد ساعة و ربع حديث من دون انقطاع، لميت شجاعتي و قتلو: دكتور الحديث معاك ممتع ، لكن وقيت

دخلنا لغرفة الفحص و احنا مزلنا نحكيو علي الجمعية

.....

في الأخير، الدكتور خرجت عامل عليه كيف، سكرنا العيادة مع بعضنا و قالي :كان معندكش كرهبة نوصلك

شكرا دكتور-

...

ليوم نمشي للبانكة الصباح، و بزهري عندهم مشكلة متاع اعلامية ، رصاتلي مبنك بحذا السيد البانكاجي حتي يحل مشكلتو و يعطيني المعلومة الي حاشتي بيها

يدخل علينا البنكاجي الي يخدم في الشباك ، حاشتو بتوقيع من عرفو

يراني ، يقلي: اما الجمعية ، ما تعجبش

أنا بهت ، سئلتو : كيفاش عرفتني و لد جمعية؟

ولاد الجمعية يعرفو بعضهم ...لا تعرف المشكل من الممرن ، و الا من الملاعبية-

و قعد يحكيلي.. و الا يشكيلي

......