نفس الألوان

ليوم نقري في الصفحة الاولي في أغلب الجرايد الي لاعب تونسي و في أول مقابلة ليه في السعودية أقصاه الحكم و قالو كلام عنصري ' ارجع منين جيت '
أول حاجة خطرت لذهني : ما ثمة كان لخبر هذا ؟؟ مثماش خبر علي جمعيتي ، اللاعب هذا و رغم الي هو تونسي ، لكنو ما يعنينيش و قلت هذا اشهار ليه و للجمعية الأصلية متاعو و الجرايد لقاوها فرصة باش يبيعو جرايدهم علي ظهر الحس الوطني ، و أنا بصراحة الحس الوطني هذا ضعيف برشة عندي

ومن بعد ، قمت نبتسم وحدي كيفاش ثمة عنصرية مبين العرب و الي السعوديين بواسطة البترول أو بالأحري فلوس البترول اصبح عندهم مركب تفوق و استعلاء علي العرب الفقراء و قلت حطونا احنا و جماعة الفلبين الي يجيو يخدمو عندهم فرد سلة

وتفكرت حكاية رواهالي صديق مشي لأوروبا في نطاق العمل ، يقابل غادي 'كحلوش' من افريقيا السوداء درس في قابس و قعدتلو عليها ذكريات موش باهية

كيما يعرفو الناس لكل ، أنو قابس و بما أنها مدينة في الجنوب التونسي، سكانها فيهم برشة من ذوي البشرة السوداء
الشيء المضحك ، القوابسية الكحالش يستهزؤو بالطالب الافريقي لأنو كحلوش و عيفوه في حياتو

السيد جاء لتونس مسلم ، هج لأوروبا كافر ، قال كان هذي بلاد مسلمة و فيها عنصرية كيما هكة السماح

صديقي يقلي احنا التوانسة عنصرين
أنا قتلو : موش برشة، هاك تري عنا لاعبين كحالش يلعبو في الجمعية و فرحانين بيهم
قالي : بصراحة ، انت تقبل أختك تعرس بواحد كحلوش؟
......