عيدكم مبروك و البقية

تحت السيل الجارف من المكالمات و الفاكسوات و الأيميلوات و الس.م.س.ات و خاصة التعليقات من طرف القراء و الزوار من الخليج الي المحيط مرورا بسويسرا و المكسيك و بلاد الواق الواق الي طالبوني ببقية القصة الفارطة ، قررت باش نلبي رغبة القراء الأعزاء و نكملها عيادي و سنين دايمه، بالرغم الي النهاية متاعها معروفة و سبق و تطرقتلها ، لكن الاسلوب متاع العروي ممتع خاصة في التفاصيل بغض النظر عن الحكاية في حد ذاتها
اذن نتمني للجميع عيد اضحي مبارك و بدات تتبع فيه حتي و صلها للخشة متاعو وولات ثمه، و هو كل صباح يخرج يسرح و يجيب لها ، مره أرنب ، حجل و مره ثعلب و مره غزال . و هي تشعل النار و تشوي و تتعشي و كلمة أعوذ بالله ما جاتش بيناتهم هي ماشية في حضوضو و هو يجري و يقول يا قلة الصحه ، عايشه معاه في خيار الخير و هو النهار لكل يكركر و يجيب .
ليلة روح يلقاها مكسبنه تتكلم بالمساسك كيف ما يقولو . اشبيك ؟ لاباس ؟ قالت لا لاباس . من غدويكة كيف كيف . اشبيك يا بنتي ؟ حاجتكشي بحاجه؟ ثماشي شكون تعدي عليك بالك توحشت ناسك و امواليك ؟ قالت لو اماله توحشت أمي و اخواتي و دارنا و اموالينا و جيراننا ماذا بي نطير منهم وحشه
قال لها عاد هذا الي عليك .. غدوه نوصلك.. من غدويكه قامو علي الصباح شدو الثنيه و صلها لآخر الغابه و قربت للبلاد و قال لها : هاهوكه زيارة النبي ثلاثة أيام ، ثالث يوم علي الفجر نجيك ، و بقاها بخير و رجع علي ثنيتو. دخلت هي للبلاد و صلت لزنقتهم دقت علي دارهم. اشكون ؟ قالت حل أنا جبره . آه جبره. خرجو يبوسو يعنقو سمعو الجيران فزعو و لات متفرحات و الداخل يهني و الخارج يهني ، و اماكل و سهريات ووين كنت ؟ هالغيبه و آما بلاد كلاتك ؟ قالت لهم يزيني من العباد و من الرجال ماخذه صيد. ماخذه صيد ؟ كيفاش صيد ؟

بدات تحكي و تفخر ( كيف ما تعرف كل مرا تفخر راجلها) القوة و الشجاعة و العفرته واش يجيب واش يجلبهم و الهوش لكل تخاف منو و العباد الكل تخاف منو و عايشه معاه عيشة الهناء و هو يجري و يطيح و لا يعرف لا سهريه لا همله كيف الرجال، ما يعرف الا الخدمه و ما يجيب لها الا الي يرضيها و ها ك النساء حالة افامها طاقه يسمعو في عجب ربي . وحده تقول علي سعدي المنكس ووحده تقول اللطف ياربي كان ناخذ صيد و كيف يقوم ياكلني.

وهي نهار الكل تشكر فيه ما تقول فيه الا المليح تشكر و تمجد و هي في راحه من عقلها لكن الأم ماهي ديمه مشكاكه بعد ما يخرجو الناس لكل و تتفرد بيها تبدا تنشد فيها و تسأل بالك بنيتي موش عامل معاك المليح ؟ بالك موش عامل لك قدرك ؟ بالك يخوفكش مرات و الا حاجه؟ تقول لها شي يا أمي .... راجل و سيد الرجال و كامل الصفات حتي الليله الاخره بدات تلح عليها حتي قالت: ما فيه الا حويجه ، فمو أبخر . هاو الصيد ( الي قاللها ماش يجيها علي الفجر يهزها) جاء بكري شويه هو في قفا الدار وهم مزالو ساهرين سمع هاك الكلمه. (قالت فمو أبخر ) رجع علي ثنيتو وعاود جاء علي الفجر خرجتلو شدو الثنية و رجعو للغابة متاعهم.
لكن الهيئة متاعو تبدلت ديمه عرق الغضب بين عينيه آشبيك يا سيدي ؟ آش جري لك آش سمعت ؟ يقل لها شي ما بيا . حتي نهار يدور هو وياها في الغابه يلقاو شاقور قال لها ايجا أضربني مابين العينين. قامت تضحك: وه نضربك ؟ و بشاقور زاده ؟ ماسهلو ( عند أهلو) قال لها قلت لك أضرب . اشنوه ؟ صار هو بالمنجد ؟ قال لها اضرب. قالت لو ريح الزمان هاك الي مازال نضرب سيدي و مولي بيتي بشاقور؟ لا منجمشي . ولي تغشش و حمارت عينيه. ولات كيف قطاعي النار و قال لها تضرب و الا توه نقص لك راسك
ولات خافت و شدت الشاقور و هزتو بالزوز يدين اعلي من راسها و تقول لو بيه العرب رحلت شقت لو راسو و بدا الدم يجري . بدات تفركس في الحشايش و تحط لو علي هاك الجرح حتي كف الدم . و قعدت ثلاثين يوم بلياليهم و هي تحط لو علي هاك الجرح الحشيش حتي تغلق الجرح و برا و الحمد لله علي سيدي و هذا النهار المبروك و بدات تزغرط، ياخي قال لها :اسكت اسكت . الأبخر ما يزغرطوش عليه ، قالت لو: وه شنوه هالكلام قال لها: لسانك صوانك، اذا صنتو صانك و اذا خنتو خانك

الجرح يبرا يا جبره....و تبرا عليه الضميده
و كلمة السوء يا جبره....تمسي و تصبح جديده

وترمي عليها كلاها