القرن 14

بمناسبة حلول السّنة الهجرية الجديدة 1429 ، انشاء الله مبروكة علي أمة محمد أجمعين ، تفكرت دعوة عمّنا الذيب مع القرن 14 و هذي حكايتو

يحكيو في الزمان المتقدم ( الله و الرسول أعلم) وقت الي كان الهوش يتكلم ، آما توة بكم مرة وحده من ظلم لعباد

جا عام طهمه كيما يعطينا في كل عام ، المطر تصب خيطين من السماء ، ليل مع نهار ، و الثلوج تكدي وصقع يقص ما عادت حتي هايشه تخرج تصطاد ، كل هايشه خانسه في خشتها تستني في الطياب ، طالت القرّه حتي قتلهم الشر وأشرفو علي الهلاك٠٠٠

عمّك الذيب ، كيف الهوش لكل، قاعد في خشتو هو و الذيبه ، لا خدمه لا قدمه لا مصيد ، ليله من الليالي الذيبه طلقت طلقه هبطت ذيب قد الفلقه ، النافسه ماهو يلزمها الزرير و السمن و العسل ، و الجلجلان ، و المتقويات باش ترد صحتها ، مسكينه بين روحين، و الذيبه ما حاجتهاش بهذومه لكل ، آما يلزمها لحيمات تِتْهشهِشْ عليهم و تحن بزازلها بالحليب

تِلزِم عمّك الذيب باش يخرج يدبّر ، ويقولو الجوع يخرج الذيب من الغابه ، خاطر الذيب يبدا ديمه هارب للغابه ، آما في الشتاء وقت اللّي يحرقوالشر، يولي ما عادش يحسب الخوف و يحط راسو في كفو ويخرج يدبّر و يوصل حتي لديار الناس ، حتي يشدوه و يقتلوه

قلنا تلزم عمّك الذيب باش يخرج يدبر ، باش مرتو وضناه ما يموتوش بالشّرو يتسلّوا مابين يديه و هو يغزر٠٠٠

خرج في هاك الغابه ، يلقاها قاعًا صفصفًا لا شيء فيها٠ البقعه الواطيه، بحر، و البقعه لعاليه اكوام ثلج ، لا هايشه تدبي علي الأرض لا طير يطير٠يفركس، وينسنس، من هوني لهوني ، حتي وصل للعمار٠وصل لِمراح متاع غنم٠٠وقف٠ النعجه ماهي تشم ريحة الذيب علي ميل و تولي تترعد، بداو ها ك الشياه هاربين و يترماو علي بعضهم، و الكلاب نبحت و السارح كان شادد الدفا و مرتاح يطيب في التاي ، خطف عصاتو و خرج ـ يجري يلقي الذيب واقف٠

آش تحب يا سي؟ ماو لا باس؟ ياخي هذي لغنم تسخايلها هامله بلا مولي لا عساس لا كلاب؟ ايّا شد الثنيه بره دور بغافل خير من اللي تخرج لك الكلاب ياكلوك طرف طرف

قالو : ما تتغشش علي من فضلك ٠ لا جيت ماشي نخطف، لا ماش نستقطع

آ !! جيت تعطي في الطريقه امّاله !؟؟-

لا، قالو: آما أختك ولدت لبارح-

اختي؟؟ اختي منين تعرفها انت؟

لا، قالو: معناها مرتي٠ خديمتك يعني٠

ايّا مبروك الّي نزادلك٠ آش جابت؟ جابت وليّد؟

اي نعم ٠ قالو: ماو تعرف العاده ، النافسه لا زمها الوديده باش ترد قوتها و باش ترضع صغيرها. ايه، وانا هالنهارين ما في حاليش ، ها القرة طالت علينا، و الهوش لكلو مخبّي٠ لا ثمه لا مصيد، لا منين نجيب٠ و خايف علي المرا و علي الوليّد

اي نعم-

قالو جيتك قاصد فضلك ، و ماك الا أهل الجود و الكرم، تعطيني نعيجه٠

اشنيه اشنيه؟ آش قلت؟ عاود؟ نعطيك نعيجه؟ ايّا تبرم برّه تلقاشي جمل قلّعلو صفايحو٠ ياخي تسخايل هالغنم هذيه خلّي هالي السّيّد الوالد، أنا سارح صبّاب ماء علي اليدين لا نحكم ، لا ِنتْفتي ـ

قالو : غنم اشكون امّاله؟

قالو : هذي غنم سيدنا سليمان

اي آشبيه قالو: اعمل مزيه امشي شاورو

نمشي نشاورو؟ واشكون نخلي في بقعتي؟

قالو :هاو نقعد أنا نعس في بقعتك

ايه، لا! لا !هذي هي الدباره٠ودّع الريه في رقبة القطوس، حط الذيب يعس علي الغنم٠ آش ماش يخلي منها زعمه؟

قالو: نعاهدك

يزي قالو تعاهدني، ياخي انتم الذيوبه عندكم عاهد و الا ميثاق٠٠؟

قالو نعاهدك علي عهد عثمان ابن عفان، راني مضام، بنت الناس قاعده للشر و البرد، خايف عليها و علي كبدي و ا ذا كان خنتك يخونني العاهد في هاك الفرفوط الي مزال كي حط ساقو في الدّنيا

السارح حن قلبوـ زعمه يا عم الذيب ما تخوننيش؟

قالو: بره يا راجل وعليك أمان الله

قالو: ايّا هاني ماشي و فين ترسّي ترسّي

هز عصاتو و شدّ الثنيه، وصل لسيدنا سليمان ، قدّم و وخّر عطي كار السلطنة، قالو: اشبيك يا سارح ؟

قالو: يا سيدي راهو جاني الذيب ، و قال مرتو ولدت و ما لقي ما يصطاد باش يجيب لها ، قال لي أعطيني نعيجه ـ قلت لو: الغنم موش متاعي قالي شاور مولاها٠٠ سخفني حالو ، هاني جيت نشاور فيك... و راهو الجلد لامم لعظم يتقضرف بالبرد، حالتو تسخف

قالو : وآشكون خليت يعسّ علي الغنم؟

قالو: خليتو هو

عجايب، ذيب يعس عالغنم؟ زعمه ما يغدركش و يهز نعجتين و إلا ثلاثه و كيف ترجع ما تلقي إلا بقعتو؟

قالو : يا سيدي عطاني العاهد و قال لي هذا عاهد اللي لا خان جار ، لا كبّر صبيّة في دار و لا بيّت نعمه علي الأظفار

قالو: امّاله برّه اختارلو النعجه المليحه السمينه المَمُّو و اعطيهالو ، و قول لو يزوّدني بالفاتحه

مشي السارح رجع للمراح ، يلقي الغنيمات لا باس ، لا مضرّه ، و الذيب واقف شادد العسه خير من غربي

دخل في الغنم يختار ، هذي، هذي.. طبّس علي النعجه لبريمه و خرّجهالو و قالو: سيدنا سليمان راهو يسلّم عليك ، و قال لك مبروك اللّي انزادلك ، وهذي هديّه ، وزوّدني بالفاتحه

هاك الذيب ، كاِنُّو مغروق و انشال ، عينيه زغّلت بالدموع و قال: آش ماش ندعي لو؟ لا يخلّي لي و لا يخلّي لو ذرية لقرن 14 ؛ التجاره كاسده ، و الاخوه حاسده و الذريه فاسده ، و هز النعيجه و مشي

و هذا هو قرن 14 ، آش أكسد من التجاره في ها الوقت هذايه، التجار سلعتهم في الحانوت وهم حاطين يد علي يد و لا من يصفّر عليهم و لا من يشري من الشيء الغالي وقلة ما في اليد

والاخوة حاسدة ، الخو يحسد خوه ، ويتخاصمو و يتقاتلو علي الورث، و ثمّه الي بوهم مازال مسبول و هم يقومو يتضاربو علي اللي خلّي ، و هذا علاش قالو كان الخو ينفع خوه ما يبكي حد علي بوه

والذرية فاسده، هاكم قاعدين تشوفو فيها . بعد اللي وصلت الناس حتي البو ولَّي يخرّج بنتو تشطح في الكافيشانطه و هو يضرب بالدربوكه٠٠٠

تمت