هوامش

هناك العديد من الأشياء التي تستعص علي الفهم و لن يجد لها المرء إجابة، رغم تعمقه في علم الفهم و التفسير
البارحة و ليس ككل يوم أحد ، تواعدت أنا و ابن خالي علي اللقاء و شرب قهوة صباحية معا ، ابن خالي هذا صديق حميم و كما تعلمون تزوج الصائفة الفارطة ومرت مدة منذ آخر لقاء بينا
إذن يأتيني بسيارته أمام باب المنزل و بعد التحية و السلام يبادرني بالسؤال
فين تحب نمشيو؟-
فين تحب انت-
يا سيدي أأمر -
باهي نمشيو لجيان، نحوسو-
لا جيان بعيد ، شوفنا بلاصة قريبة-
توة موش قتلي أأمر-
....
قررنا الذهاب الي مقهى في حي البحيرة الراقي علي ضفاف البحيرة
أنا من طبعي لا أريد الجلوس في نفس المكان لمدة طويلة، فقلت له بعد زهاء ساعة أو أكثر بقليل
أي نقومو؟-
مازال بكري علي المرواح-
نمشيو ندولشو، خير ملي نقعدو في نفس البلاصة-

هم ابن خالي بخلاص النادل، لكني أخذت أو فككت منه ورقة الحساب و قلت له
خلي عندي ، أنا نخلص الشرب و انت خلص لسونس ، نقصمو لمصروف-
كنت أظن أنه وفي جميع الحالات لا يمكن أن يتعدي الحساب الخمسة دنانير- مشروبان فقط حليب بالقهوة و حليب ساخن بالشوكولاطة

أخرجت الخمسة دنانير التي عندي من جيب البنطلون أعطيتها للنادل و أنتظر أن يرجع لي الباقي
خويا ، ناقص٠٠٠-
ألقي لأول مرة نظرة علي ورقة الحساب :خمسة دنانير و سبعمئة مليم
....

اتجهنا فيما بعد الي المركب التجاري كارفور.. وعند اقترابنا منه وجدنا مأوي سيارات هذا الفضاء مكتضا بالسيارات ، قال لي ابن خالي :ومن بعد يقلك الناس ما عندهاش فلوس و مهيش خالطة
أجبته :الأغلبية كيفنا، يجيو يتفرجو-
لا الناس تشري.. أي تعرف قداش يعملو مداخيل كل نهار، فلان راجل *** يخدم معاهم ؟

لا ما نعرفش٠٠٠ -
حوالي 300 مليون في سائر الأيام و فوق المليار في نهاية الأسبوع-
!! ثلاثميات مليون-
يحكيلي فلان : في اليوم الثاني لعيد الاضحي ، حققو مداخيل تفوت المليار ، لتوة المسؤولين و المحللين الاقتصاديين متاع كارفور لا فهموها كيفاش صارت.. يقول القايل الناس ما عندهمش فلوس بعد مصاريف عيد الضحي من علوش و غيرو، لكن جاو صرفو أكثر من مليار

...