قرد موالف

ولي ما عادش عندو ماكله، مستانس ما ياكل الا المليح ( من المصيد لللحم للحوت ) نهار ما ثماش زهومة طيبت عجة ، موش مستانس ياكل العجة، حطها قدامو خزرلها شمها و قام، قعد بلا فطور.. في العشاء كيف كيف الماكلة الي مستانس بيها مالقاهاش و الماكلة الموجودة ما كانش يعرفها في السابق و مستانس لباس ، مايلبس الا الملف المليح و الحرير المهم و البرنوس الجريدي، هذمكه ما عادش يطولهم

حويجاتو تهرات و ما عندوش باش يشري، بطل الخرجه من الدار.. و ما ياكل الا وقت الي يتقطع بالشر و تظلام عينيه و يشرف علي الهلاك . و النهار الكل و هو يخمم زعمه منين يدبر باش يلبس و ياكل حتي لين تفكر صاحبو الي دارباه للمهالك .

ليله بعد المغارب خرج ، ما ينجمش يخرج في النهار يحشم بهاك الحوايج الرثة ، استني حتي ظلامت الدنيا مشي لو للدار دق عليه، خرجت لو الخادم قاللها: حاجتي عند سي فلان قالت لو: سيدي مسافر. لوين مشي ؟ قالت: للبلاد الفلانية . وقتاش يجيء علي خير؟ قالت لو: تحبلو نصيف شهرآخر

رجع علي نفسو للدار لقي الدار سقف و قاعه المرا ما ثماش هزت نفسها و مشات لدار بوها ماعادتش تنجم تقاسي هاك الهم قال: الي يهرب منك ما تجري وراه و الي يبيعك بالفول بيعو بالقشور و منها قال: مرتي ،مرتي الي جمالها يضربو بيه الأمثال. و قعد يخمم يخلط عليها و يمشي يلحلح و يزقدح و يبوس اليدين ثماشي ما بوها يتنهزر فيها و يقول لها: قوم روح مع راجلك و منها قال: لا نمشيلها لا نكبر لها راسها. آما ها البلاد الي كنت فيها في عين صبحت في عين، ما عادتش نقيم فيها قد و في هاك الليل شد الثنية..

لوين ماشي ؟ ارض الله واسعة ، ياكل في الحشيش و فين يلقي غدير يشرب منو حتي خلطت عليه قافله، بدا ماشي معاها ، جاية من بلاد أخري موش من بلادو ، كيف سبتك يا ولدي ؟ قال: أنا من البلاد الفلانية، اشكون ؟ ولد اشكون؟ قال ولد فلان الفلاني

طلع التاجر مولي هاك القافله يعرف بوه ، و المرحوم عندو عليه مزايا. لاباس عليك ؟ آش و قع لك؟ حكي لو حن عليه قلبو و سخف قالو:أنا ما عنديش ولاد نعملك ولدي

استبناه. ولي هو يرقد و الولد يشد العسه ، ورادد بالو أكثر منو حتي وصلو لبقعه ما فيهاش ماء ..النهار الأول، الثاني ، الثالث، الزوايل و العباد ولات تتغاغي بالعطش بركوا ما عاد حد ينجم يمشي

قالو: يا بابا اقعدوا انتم هوني، وانا نمشي ندبرلكم في الماء

و شد الثنية ، نهار ، نهارين، الثالث وصل لبير و هذا العازب واقف و سالل شاكريه. السلام عليكم، و عليكم السلام . لا باس ؟ آش جاي تعمل؟

قال لو :حاجتي بشويه ماء

قال لو: ثمه ثلاثة سؤالات. اذا كان متجاوبش عليهم ، لا ثمة لا ماء لاشيء و تقرب راسك(لبعد) يلعب بين ساقيك و كان جاوبت عليهم تفضل

قالو: مليح اشنوه ها السؤالات؟

قال لو: اشنوه خيار الماكول و خيار الملبوس و خيار الزواج؟

اشنوه خيار الماكول نعرف عليه أنا، بدا يخمم و منها تفكر ، تفكر كيفاش مات بالشر خاطرو ما حبش ياكل الماكله الي موش مستانس بيها، حتي ولي مشتاقها قال لو: خيار الماكول ما حضر.. و خير اللباس ما ستر

اي و خيار الزواج؟-

قال لو: خيار الزواج ، تفكر مرتو الجميله الي هربت عليه قال لو: خيار الزواج قرد موالف ولا غزال شرود

بارك الله فيك قال لو ايا تفضل اشرب، و عبي قد الي يظهرلك

وهاك الولد هذاكه طلع ولد سلطان عجبو وخينا لقاه ظريف و أديب و فهيم مع قلب المستبلي ضيق ماخذلو بوه بنت سلطان آخر( أكبر من بوه) جمالها يضربو بيه الأمثال زاده امرتلو عيشتو و كلمة كلمتين تمشي لبلاد بوها . ها الكلمه جاتو عالمضمار

رمي عليه الصحبة، و هزو معاه للسرايا و هاك الجماعة متاع القافله بعثو جابوهم و قدمو لبوه، عجبو كيف ما عجب ولدو و عطاه بنتو