الأميرة والوحش

بما أنها المدونة متاعي اسمها علي كل لون يا كريمة ، مافيها باس نحكي مرة نكتة ولو انها معروفة و قديمة لكن شاهي نحكي نكتة، والي عندو شهوة يديرها في عشاه ، و زيد اهيكة فرصة باش نسنس يدي علي الكتابة بالعربية الي بالمناسبة تعجبني برشة كلغة وأنا في حياتي الخاصة قليل ياسر فين نقول كلمة بالسوري لكن الاستعمار لا تربحوا الي خلاني نكتب بالسوري
ادن نرجعو لأصل الموضوع الي هو النكتة و سامحوني علي الإطالة

قالك يا سيدي بن سيدي ثمة ملك كبير و عندو من الملك ما رات عين ولا سمعت ودن لكن ما كسب في الدنيا هده كان بنية وحدة مدللها والي تطلب يكون عندها و سماها أميرة و هي اسم علي مسمي خاصة في الزين
كبرت أميرة و جاْ وقت باش نشوفولها علي رويجل يكون من سلالة سلاطين كيفها
جاو الخطاب والقصر يملي و يفرغ بالخطاب من الأمراء و حتي من بعض أعيان لبلاد لكن الأميرة محلي في عينها حد و كل واحد تلقالو سبة باش ترفضوا الي مدلل ياسر و الي شعرو امسخ و الى عامل مدونة و يتكلم بالحلة

لعوام يمرو والحال بقي كما هو عليه ، حتي لين الملك قرر باش يدخل، يحب يشوف حفيدو قبل منام عينو وأميرة زادة بدا لعمر يمشي بيها وهي ما تعرفش مصلحتها

مشي يحكي مع بنتو
شنية لحالة الي فيك ما عجبك حتي أمير
ملقيت حتي راجل فيهم يا بابا
عطيتك فرصتك باش تختارو وحدك ما نجمتش روحك تو باش نتصرف أنا ، قلي بركة شنية أوصافو و كون متهنية
اللي تعمل مبروك بابا ، نحبو بركة شجاع وصحيح في شرب الكحول و قوي في المعاشرة الزوجية
الملك في قلبو ملا قلة تربية، ياسر حليتها، نعرسلها و نرتاح منها


الملك ضرب خماسو في سداسو و قال الحل الوحيد لا زمنا نشوفو نلقاولهاش راجل من الشعب عندو المواصفات هدوما
كلم المستشارين و الوزرة في الموضوع ، أشارو عليه قالولو لازم يعمل اختبار والي يتجاوزو بنجاح بصحتو و مبروك عليه ، يستحق يولي صهر للملك و ما أدراك

وهو عبارة علي ثلاثة بيوت،لازم المترشح و المتباري الي يحب يكسب ود الأميرة يتعداهم ،

البيت الأولي فيها برميل كبير جدا مملوء بالخمر الأحمر ، يجب علي المتباري ان يكمل البرميل علي آخره حتي آخر قطرة
و من بعد يتعدي للبيت الثانية يلقي امرأة ما تصلحش حشاكم جابوها خصيصا للاختبار تستنا فيه والمتباري لازمو يعاشرها عشرين مرة معاشرة الازواج يخرج منها في ساعتين علي أقصي تقدير
البيت الثالثة آخر بيت يلقي فيها دب كبير لازم ينحيلو نابو
و فقط

يبقي كان نعتيوه تاج الشجاعة والمعاشرة الزوجية و شرب الخمر ،الشيء الي طلبتو الاميرة في بعلها ، و يكون هو مولي بيتها

أي توة انا قلقت مالحكاية نمشي نشوف عنديش خدمة ، توة نكمل الباقي مرة أخري للي ما يعرفهاش