الي موش مستانس بالبخور تتحرق حوايجو

الأسبوع الفارط ، كنت في اجازة ، وأنا في العادة ناخذ اجازة باش نبدل جو الخدمة أكثر منها حاجة أخري
البارح رجعت للخدمة وانا فادد من الاجازة و قلت حققت الهدف متاعي من الإجازة،
و توة لا هي عاجبتني الخدمة ولا نحب ناخذ إجازة

في الإجازة مشيت لبنزرت في قضية ، وريت صياد في فلوكة في البرط و قعدت نتفرج فيه ، و حسدتو كيفاش ماهوش عاطي قيمة للوقت ، في حين أنا لازمني نمشى نخدم في الوقت لفلاني و نروح في الوقت الفلاني ،و قلت صحة عليه..

عندى ولد خالتي جاء من فرنسا و جاب معاه تجهيزات متاع مصيد من صنارة وغيرها ، قلت فرصة نمشى نصطاد
مع الثانية ظهرا في غرغور القايلة شدينا الرحال الي غار الملح.. قتلو نتعداو نشريو مشروبات نقصرو بيهم الوقت ما حبش.
و صلنا لسيدي علي المكي ، طلعنا في الجبل ، هبطنا في الحجر ، حتي لين عجبتو بلاصة..و عجبتو خاطر بعيدة عالشبك متاع الصيادة..
أنا بصراحة مانيش مغروم ياسر بالعومان في الحجر ..أكثر منها خوف ملي مانعرفش نعوم...لبلايص الي ما نعرفهمش نخاف منهم....رميت روحي ملزوم باش نبرد شويةو زيد نعمل برنزاج..و مقعدتش في الماء أكثر من عشرة ثواني، طلعت نجري ، تقول شكون خالط علي

ممكن بعد ساعة شدينا أول حوتة ، ولد خالتي فرحان ، أنا زادة.. مزيانة ..وتوزن ممكن متين غرام.
ولد خالتي شايخ قالي هذه نوعها ورقة و النوع هذا غالي و كلوه يوصل 15 دينار..
أنا قلت ليوم شبعة بالحوت بالرغم الي أنا منيش مغروم بيه ياسر كماكلة

و قعدنا للسبعة متاع لعشية و احنا نتفرجو في الحوتة

أنا بصراحة قلقت ياسر..في العادة نتكيف زوز ثلاثة سواقر في النهار...ممكن في القايلة هذيكة بركة و صلت للباكو..وانا مطيش علي حجرة تحت الشمس.

........