كل واحد و قسمو، البقية

نواصل
ولد خالتي كينو فرح كي قتلو تو نتصرف وحدي ، قالي تصرف و كلمني

رجعت للكرهبة، معرفت شنعمل، عاودت خدمت شكون قال تزهر معاي المرة هذي ، زايد، لا فايدة.
بين قوسين الحالة هذه فكرتني توة في امتحانات الباك و الفاك ، كي نو حل نبعد ورقة لمتحان ، و نبنك ما نعمل شيء ، تقول منيش هوني ، نقعد ربع ساعة ، أربعة دراج، وانا قاعد هكاكة نتفرج في العباد و عايش في الخيال.
حا سيلو وقفت بحذ الكرهبة سارح، نعمل طلة علي يميني ، نلقي حانوت بعيدة حكاية متين مترو ، مكنيك و الا الكتريك سيارات ، فرحت و قلت اذا ربي رايدلك بالشفاء تلقي طبيب في الثنية

مشيت للحانوت ، طلعت الكتريك السيارات، نلقي في شاب قدام الحانوت عمرو حكاية عشرين سنة تقول يستني في، حكيتلو لحكاية ، مشا معاي للكرهبة، دري شنو مس باش خدمت و هزيناها قدام الحانوت
قعد يبربش في البلوكيس المشكلة غادي

أنا هكة و نري في دخان طالع من الكرهبة ،
نقلو قتلك نشم في لحراق
يمشي شيرة الدخان ، يطلع الشوفاج متاع الكرهبة تحرق

و الغريب في الأمر، الي لا علاقة مبين لبلوكيس والشوفاج ، كل حاجة في شيرة

وقفت الكرهبة علي حاجة ، رصاتلي نصلح في حاجة اخري

الالكترسيان عملت عليه جو بصراحة ، طفل عاقل و تقي
خدمنا الكرهبة كيما يعملو السراق من غير مفتاح و مشينا نلوجو علي القطعة المهلوكة
و زاد عجبني ، عند البياع طلب كان فيشة متاع 404 باشي ، قالي تمشي مع 205،

تكلفت 3 دنانير ، فعوض نبدل قطعة كاملة ب20 دينار

باش نخلصو فلخر كنت معمل باش نعطيه 10 دنانير

، طلب6 دنانير ، عطيتو8 دنانير ،
قالي 6 يزي


مخ الهدرة ، أرزاق تساق ،
باش أنا نخرج من الخدمة امخر علي غير عادتي ، ندور علي اليسار علي غير عادتي ، الكرهبة تمشي و نوقفها علي حكاية ، تطلع حكاية أخري والكرهبة تقف بحذ حانوت السيد

خبزتو جاتو ليدو و كل واحد و قسمو