ذكريات عام الباك

بمناسبة الباك ، مفيها باس نحكي علي الباك متاعي و إلا بالأخص عام الباك
أنا لحقيقة متاع ربي ، تلميذ عادي ، وحياتي لكل ننجح بعشرة الحاكم ، لكني ننجح ، والقوة متاعي تجي كان في الثلاثية الأخيرة
عام الباك عملت دروس خصوصية في العلوم الطبيعية عند أستاذة يقولو الي هي غولة في ميدان العلوم و بصراحة نفعتني ، يعطيها الصحة، وصلت جيت الثاني في قسمي في مادة العلوم
و دروس خصوصية زادة في الفيزياء ، ممكن مزال يسالني معلوم الشهر الأخير، مخلصتوش فيه، ممكن
نتفكر مرة نقراو عندو في الفيزياء ، حكاية العشرة متاع الليل و هو عامل بيت في دارو مخصصة للغرض هذا، ونسمعو في ولدو، طفل صغيرعمرو ميفوتش خمسة سنين، يغني ، ترمي ترمي ... شد تنا نوبة متع ضحك..والضحك مايقوي كان كي تحاول تمنعو ، يا حسرة
وفي الرياضيات نسلكها وحدي

الحاصل الثلاثي الأول نجيب تسعة معدل ، الثلاثي الثاني تسعة كذلك ،
وقتها خذيت قرار استراتيجي الي لتوة فخور بيه، خاطر نتصور لازمو قوة شخصية
قررت باش نخصص الثلاثي الثالث لكل، مراجعة و تحضير للمناظرة ،

ما عادش نمشي للمعهد و المواد الأساسية نتبعهم في الدروس الخصوصية ،

عملت حساباتي ، قلت زايد، منيش باش نخلط نجيب معدل عام متاع العام يفوق العشرة والي هو ما يصلح كان في حالة النجاح بالإسعاف ، حددت الهدف متاعي ،إذن، باش نجيب العشرة في المناظرة وفقط

و بالرغم من امتناعي علي الحضور في الثلاثي الثالث جبت أيضا تسعة معدل في الباك الأبيض، لكن في الأسبوع الأخير قبل المناظرة و الأمتحان الحاسم ، ملقيت من حضر، كان عندي احساس الي كملت حضرت كل شيء

في السبور زادة ، ضحكة أكثر منها حاجة أخري
نتفكر باش نختارو مبين القفز وإلا القفز الثلاثي
حبيت نجرب القفز الثلاثي و الي كيما تعرفو تعمل ثلاثة قفزات و تنقز و يحسبولك قداش نقزت في التراب
أنا عملت ثلاثة قفزات و نقزت و مو صلتش للتراب

ونهار الباك سبور ، شربت منشطات و فيتمنات، خلاوني نهارين مرقدتش، لكن ممكن ساعدوني في الجري و عملت ميات متر ممتازة