الكفّ

يحكيو علي سلطان (وما سلطان الا الله) سلطان من أكابر السلاطين من هاك الي تحتهم ملوك و أمراء و قداش من بر و كل بر حاطط فيه ملك يحكم باسمه ويدفع له في الجزية والخراج و خطبة صلاة الجمعة في كل جامع و في كل مملكه باسمه

ليله هو نايم و يحلم بنفسو كلا كفّ

مافهمش آشنوه هاذي و تحيّرمنها و توشوش و من غدويكه بدا يبعث و يجيب في العلماء و المفسرين باش يفسرولو هاذي المنامه، كل واحد يفسرهالو جنس، لكن كبيرهم ( الي أكبر منك بليلة و أزيد عليهم بحيله) قالو: يا سيدي هذا الكف ثابت لازم ماش تاكله وما عندك وين تمنع منه

كيفاش نعمل؟ دبّر، قالو : آش ماش ندبّر يا سيدي؟ ما عندي إلا دباره وحده: الكف ماش تاكله ماش تاكله، الملكه و الاّ الصغير و الاّ طفله و الا هي جاريه تعطيك كفيّف صغيّر باللعب و يصدق المنام و تِتِّفْصَل النازله من غير ما يسمع حد.

قال هذا موش ممكن، أنا سلطان يحييني قدري و زماني و ترضي مرتي وإلّا جاريه والّا ولدي يعطيني كف و لو باللعب، إمّاله أنا باش سلطان إذا كان بنادم ينجّم يمد يدّه علي لوجهي، عمري ما ندخل تحت هذا السقف وما نرضي يطيح قدري وقدر جدودي الكل.

قعد أيام يخمم و منها عزم قال: أنا الكف ماكله ماكله و ما عندي لوين نمنع منّو وهاذي مفيهش عمّي قطّعني واد خير ملي نقعد راكبني هلواس و تتنغص حياتي و آش شكون يعرف يعطيوهولي في موكب وإلا مجلس حكم وإلاّ قدّام الملوك و الرعيّة٠٠٠ نمشي ناكله لبرّه من بلادي أحسن، ناكل الكفيّف في بلاد الّي ما يعرفني فيها حدّ خير ملّي يطيح قدري في البلاد الّي نحكم فيها و يقعد تاريخ لولادي و لولاد أولادي و عار الي يمحيهش الدهر نغيب حتي يتحل الرصد و يتنفذ الوعد و من بعد فيها مدبر يدبر

جاب ولده حطو يحكم في بقعته و عمل زاده وزواده و ما يقر علي قلبه وافاده و الملكه تبكي و أولاده و بناتو مكبشين في أذياله ، قال: شي. دخل للروي رمي سرج علي فرس من جياد الخيل و عيّط بالك قال : ياللي ما تخيب قاصدك. شد الثنيه ساير علي الأرض غاير، صاحب التدبير يدبر فيما شاء وقدّر يخلي بلاد و يعمّر بلاد و ما يخلي و يعمّر إلا العزيزالجواد حتي خرج من الحداده متع ترابه

وأنا انقل في حكاية الكف الي كلاه سيدنا السلطان وقتلي الكف كانت عندو هيبة و قدر تفكرت كف كلاه تلميذ درس معاي في السزيام و عمرنا وقتها ميفوتش حداشن سنه
سي المعلم في الوقت هذاكة كانت عندو سناسه ، الي يجاوب صحيح يْمَسّحْلو علي خدو و يقلو صحيت و لدي أحسنت ... ولي يجاوب من التلامذه يبدا يستني في الحركه هذيكة و يبدا فرحان بيها تقول قرد رميتلو كعبة حلوي

نهار من النهارات، المعلم سئل سؤال صعيب شوية ، حتي حد ما جاوب كان تلميذ واحد هز صبعو عطي اجابة٠٠ الطفل مطمان مادد خدو يستني في المعلم باش يمسّح عليه ويقلّو أحسنت و السيّد يقدم و يوخر و يعطيه كف، أنا لتوة لنسيتو٠٠

شخصيّا كليت ثلاثة كفوف في حياتي و لكلهم في سن مبين الخامسة و العاشرة، زوز من عند الوالدة و كف من عند الوالد و هذا الأخير ممكن غيرلي مجري حياتي جذريّا٠٠