تلقي عملك

يحكيو علي واحد جنّان يخدم في الجنينه متاع السلطان، نهار ( الحال شتاء) يلقي شجره متع خوخ فيها خوخه، غله من غير وقت، في كعبة البرقدان خد بخد سبحان الخلاّق فيما يخلق٠٠٠
السلطان يدولش في الجنينه و يتفرج، مشي لو يجري قالو: يا سيدي ايجي شوف ها الخلقه ، مشي معاه السلطان تفرج في ها الخوخه العجيبه، قالو: رد بالك عليها، و كيف تطيب قصها و جيبهالي ( هي مزالت خضراء تحبلها كيف مانقولو جمعه باش تطيب) ، سي الجنان مشي يجري جاب حصيره ، فرشها تحت الشجره و قعد ثميكه يعس
ليل مع نهار و هو ثميكه شادد العسه، و عينو ما تتنحاش من هاك كعبة الخوخ (لا معبود الا الله ) حتي عشاه و فطورو يجيبوهم لو لثميكه
علاش موش نهار يجي نسر يحط علي هاك الشجره، و يكسر الأفراع متاعها و يفسد كعبة الخوخ يغفصها
مشي الجنان يجري للسلطان، يا سيدي راهو ها ماصار و ها ماصار
قام معاه السلطان مشي للجنينه شاف الشجره كيفاش مكسره، قالو : يلقي عملو. قعد الجنان حاير في أمرو، اشنوه نسر يجي يكسر شجره ، يلقي عملو. ياخي هو بنادم باش يلقي عملو ....؟
قعد يضحك علي السلطان : الله الله. نسر يلقي عملو، و هذا سلطان سلاطين آخرالزمان٠٠٠

ايا تعدات مده و هو باقي يخدم في هاك الجنينه، نهار يسمع في حس و تصرفيق جا يجري، يلقي هاك النسر فوق شجره، و حنش كبير اكحل متمكن بيه يبلع فيه ( و الآخر يصرفق في جوانحو و يفركس باش يمنع) و الآخر يبلع فيه بالشويه بالشويه، حتي زرطو الكل و تسرسب هاك الحنش مع الشجره حتي للقاعه و مشي
تعجب هاك الجنان، و مشي يجري للسلطان حكي لو بالقصه .... قالو يا سيدي الحنش بلع النسر و كلاه
قالو : يلقي عملو
اشنوه ها الكمنطرو هذايه، نسر يلقي عملو؟ حنش يلقي عملو؟ ياخي شنية صنعتوالحنش ؟ ما هو يبدا يصطاد. فين يلقي هايشه الي يقدر عليها يترمي عليها و يبلعها ياخي حتي في هذي يلقي عملو ؟
زاد السلطان نقص في نظرو٠٠٠


ايا تعدات أيام، مشات النازله من بالو، نهار هو يخدم شادد المسحه و يعزق و ضربه من الضربات تجي في اللحم ... جا يشوف يلقي نفسو : هاك الضربه جات في الغار متاع الحنش ، و الحنش تقص راسو راس حنش من هاك القادرين، بشعرو ، يفجع
رماه في مخله و مشي اداه للسلطان. قالو: اشكون قتلو هذايه؟
قالو : يا سيدي هذا هو الي كلا النسر، أنا نخدم و ضربتو بالمسحه قصيتلو راسو ، قالو: تلقي عملك
اشنيه ؟ توي و ليت أنا ماش نلقي عملي؟ علي حنش قتلتو؟ حنش الي هو عدو بنادم؟ ايا السلطان خرف مرّة وحده الله الله. بلاد يحكم فيها سلطان فالت لو ، لا لا مشات أمورنا مليح٠٠٠


قعد أيام و فين يتفكر كلام السلطان يقوم يضحك، بعد مده مشات النازله من بالو
علاش موش نهارمَرْت السلطان ماش تجي تتفسح في الجنينه هي و بناتها ، جا باش حامبه نبه علي باش جنان ، خرج الجنانه الكل
هاك الجنان يخدم في بقعه مدغوره، ما سمعش و ما فطن بحتي شي و نساوه
هو يخدم ، و يسمع في نساء تتكلم، و لعب و ضحك و جري ،عرف الي الحريم جا ، و ين ماش يمشي و ين ماش يتخبي وين ماش يهرب، بحذاه شجره عاليه تشعبط فيها و طلع تخبي في أغصانها
سعدك و المسعودين هاك الشجره جات تحت الجابيه قد قد٠٠٠
و الجماعة قاصدين الجابيه٠٠٠
دوب ما وصلولها قالو نعُوموا ، ما كانوش من العاكسين طاحوا ينحيو في حوايجهم الي تنزع تنقز تجي في الماء

و عوم و تشلبيق وبخّان بالماء و عياط و صياح ، ياخي واحده منهم شافت خيال في الماء هزت راسها تشوف في سيد العين في الشجره يتفرج و ريقتو سايله ، ما فاتو شي كانو في الصف الأول في التياترو٠٠٠

قامت الصيحه، جاو لعساكر يجريوا، اش ثمة ياِ لله ؟ لا باس ؟ قالت لهم :شوفو هاك الكلب بن الكلب الي مخبي في الشجره يتفرج فينا

هبطوه، عطاوه طريحة نباش القبور، و هزوه (وينو مشطك يا عروس) رماوه في الحبس

هاوكه في الليل السلطان حكات لو مرتو ، علي الصباح مشي للمحكمه ، الحكم الأول قال : هزوا هاك الجنان اشنقوه

مشات الطامه و العامه، لبسوه القشابيه عملولو ما يلزم للعرايس ( للمشانيق) هزوه للمشنقه

ماوا العاده الي ماش يقتلوه يشهيوه، قالولو : تشتهي حاجه ؟ قال نحب توقفوني قدام السلطان نقولو كلمه و حده

اداووه للسلطان و قف قدامو قالو : يا سيدي، حكمت علي بالمشنقه ؟ قالو : ايه ، قالو : تلقي عملك.

اشنيه.. اشنوه ها الكلام ؟

قالو : النسر كسر الخوخه قلت يلقي عملو ، كلاه الحنش ، قلت يلقي عملو ، قتلت انا الحنش قلت لي : تلقي عملك ، توه حكمت علي بالموت ، تلقي عملك

قال : سيبوه ، أيا اذهب من قدامي

تمت